Приближно 12 отсто од канцелариските бироа во Германија остануваат неискористени во текот на работниот ден, бидејќи работа на далечина стана норма по пандемијата, соопшти германскиот истражувачки институт – Ифо.
Тој процент е околу трипати поголем во споредба со 2019 година.
Речиси празни канцеларии се најчести во секторите како што се информатичката технологија, рекламирањето и деловното советување.
„Околу четвртина од вработените редовно работат од дома. Некои работодавци одлучија да ги претворат своите празни канцеларии во заеднички работни простори кои ги делат со други, додека други ги намалуваат деловните простории за да заштедат на трошоци,“ изјави истражувачот на Ифо, Симон Краузе.
Според Краузе, ваквиот тренд може да има последици врз пазарот на недвижности, кој веќе е под притисок на повисоките каматни стапки и трошоците за изградба.
Ифо е институт за економски истражувања на Универзитетот во Минхен и спроведува месечни анкети меѓу неколку илјади германски компании на различни теми.
МИА/Фото: Unsplash