По измените на Кривичниот законик пред застарување е уште еден случај на поранешното Специјално јавно обвинителство (СЈО), „Талир“, кој се однесува на финансирањето на опозициската ВМРО-ДПМНЕ.
Случајот го води судијата Осман Шабани, а застапник на обвинението е обвинителката Ленче Ристоска. На вчерашното рочиште таа предложи, а судијата треба да донесе одлука на наредното за застарување на делото „Злоупотреба на службената положба и овластувања“ за поранешниот министер за транспорт и врски, Миле Јанакиески.
Адвокатот на партијата ВМРО-ДПМНЕ, адвокатот на поранешниот генерален секретар на Владата, Кирил Божиновски и исто така обвинетиот Илија Димовски, побараа од судија да донесе решение за застарување и во нивните случаи.
Шабани најави дека на наредното рочиште, на 10. ноември, ќе се произнесе по сите предлози.
Во случајот се обвинети и поранешниот премиер и лидер на ВМРО-ДПМНЕ, Никола Груевски, на кого му се суди во отсуство, Божиновски и Јанакиески, се товарат за „Злоупотреба на службената положба и овластувања“ и „Перење пари“, како и Димовски, а Леко Ристоски и Елизабета Чингаровска, се обвинети само за делото „Перење пари“.
Чингаровска призна вина и се спогоди со Обвинителството, за што доби условна казна од две години.
За истото дело, како правен субјект со обвинението опфатена е и политичката партија ВМРО-ДПМНЕ.
Првото рочиште за случајот „Талир“ се одржа на 18 февруари 2019 година.
ПОВРЗАНИ ВЕСТИ
Застаре и предметот за Ивона Талевска и Љупчо Димовски, „Продуцент“