Македонија ќе купи осум повеќенаменски хеликоптери од италијанската компанија “Леонардо“, соопшти министерката за одбрана, Славјанка Петровска во интервју за 360 степени.
Таа информираше дека понудата на италијанската компанија била потврдена како најсоодветна во процесот на модернизација на хеликоптерските капацитети на македонската Армија.
Набавени ќе бидат два типа на хеликоптери, Агуста 149 и Агуста 169. Едниот хеликоптер е со поголема носивост, до 14 патници со опрема, а другиот е со помала носивост, до осум патници исто така со вклучена опрема.
Годинава се очекуваат и околу 16 дополнителни JLTV оклопни возила од американско производство, како и првите оклопни возила “Страјкер“.
Испораката на системите за противвоздушна одбрана од Франција се очекува во втората половина на 2025 година, додека артилериските системи од Турција треба да пристигнат во периодот 2025-2026 година.
Фото: АРМ