Преку Единствениот повикувачки број за итни случаи 112 во Центарот за управување со кризи (ЦУК) била добиена пријава дека на Попова Шапка се изгубиле шест лица, кои не можеле да се ориентираат и побарале помош, информираа од ЦУК.
Со ски-лифт се качиле горе на скијачките патеки и кога се обиделе да се спуштат надолу паднала многу густа магла, а и поради снегот што бил нов и немало изгазена патека од други скијачи, тие не можеле да се ориентираат за правец за спуштање, па се јавиле за помош на 112.
Од ЦУК веднаш биле известени СВР Тетово и раководителот на РЦУК Тетово. Во меѓувреме, лицето вработено на ски-лифтот пронашло пет од изгубените лица, а подоцна во 16.15 часот го пронашло и шестото изгубено лице.
Прво сите биле згрижени во полициската станица на Попова Шапка, а потоа безбедно се вратиле во нивните домови.
Фото: Ски-центар Попова Шапка