Бугарија на состаноците на Европскиот совет денеска и утре ќе побара Европската Унија (ЕУ) да ги повтори своите позиции во врска со Македонија и да се повика земјава да ги исполни обврските.
Во Брисел е бугарскиот технички премиер Димитар Главчев, кој ќе бара во заклучоците од дводневниот собир да биде вклучен и текст за Македонија.
„Премиерот ќе побара од Европскиот совет да ги потврди заклучоците од 14. декември 2023 година, како и заклучоците на Советот за Северна Македонија и Албанија од 18. јули 2022 година и да ја повикаат Северна Македонија да ги преземе чекорите наведени таму за да постигне напредок на нејзиниот пат кон европската интеграција“, информираа од бугарската Влада
Главчев во Брисел допрецизира што значи оваа информација од бугарската Влада.
„Во декември 2023 година беше конкретно напишано и фокусот беше на уставните измени. Во последно време гледаме изјави, ајде од партиски лидери, но и од владини функционери во Северна Македонија кои велат дека такви промени нема да се прават и за тоа ќе ги информирам моите колеги од ЕУ и да се присетиме што било договорено за ова прашање.
Во моментов не се разговара за можни идни чекори, но претпоставувам дека и грчкиот колега ќе учествува за ова прашање… За мене е важно да ја претставам бугарската позиција, која е европска позиција.“, изјави Главчев.
Нема информација дали прашањето за Македонија во Брисел ќе биде отворено и од Грција.
Фото: Унсплеш