Претседателот на опозициската СДСМ, Венко Филипче оцени дека разговорот со премиерот и лидер на ВМРО-ДПМНЕ, Христијан Мицкоски во Владата бил конструктивен, а начелно договориле формирање на заеднички тела и комисии.
„Начелно договоривме дека ќе работиме на начинот да формираме заеднички тела или работни групи во делот пред се на спроведување на реформската агенда.
Значи првичните закони кои што треба да стигнат во Собранието во делот на правосудството, нешто што ги тангира сите, понатаму енергетиката и некои работи во однос на стратешките движења и проекти во здравството,“ изјави Филипче по средбата.
Од Владата информираа дека на средбата била истакната потребата да се работи на заедничката иднина за граѓаните, како и да се работи на консензус меѓу различните страни за клучните прашања за државата и добробит на сите граѓани.
„Во тој контекст неопходно е да се мобилизираат сите напредни поединци и структури кои можат да дадат придонес на патот за развој на земјата.
Македонските државни интереси треба да бидат појдовната точка во разговорите за секое прашање, при што Мицкоски побара од Филипче да се потруди да биде конструктивен фактор во определбата за промени, реформи и напредок.
Државата мора да биде во служба на граѓаните, и да се случат коренити реформи на системот од кој граѓаните се незадоволни, истакна Мицкоски на средбата.
Соговорниците се договорија да се формираат работни групи кои ќе разговараат за реформските законски решенија кои треба да ги гарантираат заложбите за напредок„, велат од таму.
Фото: Влада