Националистичката и десно популистичка Партија на слободата (ПВВ) е победник на предвремените парламентарни избори кои се одржаа вчера во Холандија.
Лидерот на партијата, Герт Вилдерс е познат по своите антиисламски, антиимигрантски и анти-ЕУ ставови.
Тој во текот на предизборната кампања ги ублажи овие ставови, но изборната програма на неговата партија го задржа неговиот остар антиимигрантски тон.
Во текот на својата 25-годишна политичка кариера ги нарекуваше Мароканците „ѓубриња“, за што заработи и судска казна, организираше и „конкурси“ за карикатури на пророкот Мухамед, а ја промовираше и својата „мисија за запирање на исламската инвазија на Западот“.
Поради ваквите ставови во 2004 година доби и закани по животот, поради што беше ставен под полициска заштита.
Тој по победата порача дека неговата партија ќе се погрижи за враќање на Холандија на Холанѓаните и за ограничување на миграцијата.
Во политика влезе во 1998 година како член на либералната Народна партија за слобода и демократија (ВВД), која ја напушти во 2006 година и ја формира ПВВ. .
Вилдерс е роден во 1963 година во Венло, во близина на границата со Германија, во католичко семејство во доминантно протестантската Холандија.
Својата политичка кариера ја изгради на антиимигрантска политика, а неговата мајка е половина Индонезијка.
Фото: Фејсбук/Вилдерс