Денес во просториите на Винчини Развоен центар се одржа првиот академски час на единствената национално сертифицирана програма за пекар, слаткар и кондитор, Винчини Академија, информираат од таму.
На свеченото отворање учесниците имаа можност да слушнат повеќе за наставната програма и да ја посетат модерната лабораторија во која ќе се одржува практичниот дел од предавањата.
Основачот на Макпрогрес, Глигор Цветанов, кој стои зад оваа Академија, им посака добредојде на учесниците и ја истакна важноста на неформалното образование и континуираното учење.
„Оваа Академија, не само што се стреми да ги надогради професионалните капацитети на младите, туку има и повисока цел, а тоа е креирање работна сила и спречување на иселувањето на младите од Источните краеви на земјата,“ истакна Цветанов.
На свеченото отворање присуствуваше и Академскиот директор на програмата, Фросина Мешкова, како и инструкторите, кои своето знаење и искуство ќе им го пренесат на првата генерација учесници во Винчини Академија.
Винчини Академија нуди идеални услови за учење, напредување и професионален развој преку практична работа и едукација, која ќе се одвива во Винчини Развоен Центар , опремен со најсовремена технологија за развој на нови прехранбени производи.
Сите заинтересирани кои се веќе дел или сакаат да навлезат во светот на пекарско-слаткарската индустрија се добредојдени да аплицираат и да станат дел од Винчини Академијата.
Програмата е поддржана од страна на Европската банка за обнова и развој и Владата на Јапонија, а е имплементирана од консултантската компанија Приме Поинт Партнерс.