Никој од лекарите од Детска клиника не сакаат да бидат дел од Комисија која ќе утврдува како настанале модриците на тримесечното бебе со наод за тромбоцитопенија, објави Слободен печат.
Лекарите на стручен состанок го известиле директорот Реџеп Мемеди дека нивната работа не е да утврдуваат намери, туку прво семејството да поднесе пријава, па потоа да го повика Обвинителството и да ја води процедурата на ниво на истражни органи, бидејќи обвинувањата на семејството се исклучително сериозни – физичко насилство од медицинска сестра врз тримесечно бебе.
„Вистината е дека воопшто немало намера да се повреди бебето. Ова се случило во една процедура за земање крв за анализа. Обично работат две сестри. Едната ја фиксира раката за да се земе крв.
Можеби поради механичката фиксација со рака, се случило да се појави хематом на десната рака на бебето. Констатирав дека според сите информации и околности, извор на ова недоразбирање е вербалната комуникација која можеби не е како што треба.
Оваа комуникација подоцна отворила дилеми кај родителите на детето дека можеби овој пристап е со други мотиви,“ изјавил Мемеди за „Портал Икс“.
Со оваа изјава, случајот добива друг тек, од обвинување за малтретирање од страна на сестрата дека семејството не знаело македонски, до утврдување „дали имало намера“ за повреда.
ПОВРЗАНИ ВЕСТИ