Порталот Плусинфо објави дека 28- годишна медицинска сестра од општата болница во Кичево поради компликации од коронавирусот во текот на вчерашниот ден ја загубила битката.
Директорот на општата болницата во Кичево, д-р Станко Трпески за Плусинфо ја потврди информацијата. Таа не била вакцинирана, поради други здравствени причини.
– Во текот на минатата недела нашата колешка беше примена во болницата во инфективното одделение кај нас при што и беше укажана соодветна грижа. Таа се лекуваше во болнички услови од четвртокот до неделата, но поради влошената здравствена состојба беше транспортирана на Инфективната клиника во Скопје, вели Трпески за порталот.
Тој вели дека по пристигнувањето во Скопје, состојбата на сестрата значително се подобрила, но за жал во текот на вчерашниот ден изненадувачки дошло до влошување на состојбата, по што во попладневните часови ја добиле лошата вест, дека младата медицинска сестра не успеала да се избори со коронавирусот.