Актуелната министерка за правда, Рената Дескоска е прифатена за нов член на Венецијаската комисија од Македонија. Таа доаѓа на оваа позиција на местото на професорката Тања Каракамишева.
Информацијата на Фејсбук ја сподели Дескоска, а нејзиното име и официјално стои на официјалната веб страна на Комисијата.
Опозицијата негодува, а лидерот на ВМРО-ДПМНЕ, Христијан Мицкоски обвини за конфликт на интереси и ја повика Антикорупциската комисија да го испита случајот.
И Дескоска исто така вели дека Антикорупциска треба да поведе постапка за нејзиното именување.
Нејзиниот мандат е 4 години.
Која е Дескоска?
Проф. д-р Рената Дескоска е родена во мај1972 година во Скопје, стои во нејзината официјална биографија.
Дипломирала на Правниот факултет при Универзитетот „Св. Кирил и Методиј” во Скопје во 1994 година со просечен успех 9,55.
Постдипломски студии завршила со просечен успех од 10,00 и магистрирала на тема: „Типови извршна власт” во 1997 година, на Правниот факултет во Скопје.
Докторирала на Правниот факултет во Љубљана во 2002 година, на тема „Конституционализмот, уставите и човековите права, со студии на случаи од Република Словенија и Република Македонија” со што се стекнала со назив Доктор по правни науки.
Од 1995 до 1998 година била демонстратор на Правниот факултет – Скопје, а во 1999 година се вработува како асистент на истиот факултат, каде во 2012 година е избрана за редовен професор на научната област уставно право и политички систем.
Во 2014 и во 2016 година е избрана за пратеник во Собранието на Република Македонија.
Во периодот од 2015 до декември 2016 година, Дескоска ја извршува функцијата потпретседател на Собранието на Република Македонија од септември, и шеф на делегацијата на Република Македонија во Парламентарното собрание на ОБСЕ.
Од септември 2015 година, како член на Парламентарното собрание на Советот на Европа, е и член на ад-хок комисија на Парламентарното собрание на Советот на Европа за набљудување на парламентарните избори во Бугарија во 2017 година, и член на ад-хок комисија на Парламентарното собрание на Советот на Европа за набљудување на претседателските избори во Србија во 2017 година.
Во 2012 година, на предлог на Венецијанската комисија, Дескоска е избрана за член на Советодавниот панел на експерти за слобода на вероисповед на ОДИХР (ODIHR Advisory Panel of Experts on Freedom of Religion or Belief).
Во периодот од 2008 и 2009 година таа е консултант за избори на UNDP, а во 2003-2004 е консултант на DIFID.
“Со своето професионално искуство, Дескоска се јавува и како домашен експерт за „Правната и институционалната рамка за интеретнички дијалог“ (2009), член е на работна група за подготовка на „Националната стратегија за интеграција на Република Македонија во Европската Унија“ (2003), Советник за уставни и правни прашања во Кабинетот на претседателот на Република Македонија (од 2004 до 2009), и член на ад-хок комисијата за испитување на настаните од 24-ти декември 2012 година“, стои во нејзината биографија.
Учествувала на четириесетина конференции, тркалезни маси и семинари. Има објавено 38 трудови на англиски јазик, 14 трудови на македонски јазик, а учествувала и во повеќе од 35 домашни и странски проекти.
Фото: Влада