Јавен обвинител од Основното јавно обвинителство Скопје донесе Наредба за спроведување истражна постапка против 36-годишно лице за кое постои основано сомнение дека сторило две кривични дела „тешки дела против општата сигурност“, како и „недозволено изработување, држење, посредување и тргување со оружје или распрскувачки материи“.
Како што соопшти Јавното обвинителство, на 4 јануари, на улицата „Јабланица“ во Скопје, осомничениот полеал паркиран автомобил „Ауди“ со запалива дериватна течност и со запалка ја активирал.
Со ова тој предизвикал силна експлозија и целосно опожарување на автомобилот со штета во вредност од 450.000 денари, како и делумно опожарување на автомобил „Форд мондео“, кај кој била предизвикана штета од 10.000 денари.
По експлозијата, сопственикот на автомобилот „Ауди“ излегол на терасата од неговата куќа и го забележал осомничениот како бега од местото.
При претрес во домот на осомничениот на 5 јануари, полициските службеници пронашле полуатоматски пиштол марка „Црвена застава М57“ со калибар 7,62Х25 мм, два куршума во рамка, како и дополнителни 54 куршуми.
„Бидејќи постои опасност од бегство, можност осомничениот да влијае врз сведоците и да ги повтори кривичните дела, надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор“, се наведува во соопштението од Обвинителството.