Народниот правобранител на Албанија побара поништување на одлуката за задолжителен двонеделен карантин за лицата кои влегуваат од Северна Македонија и од Грција, оценувајќи при тоа дека тоа го спречува остварувањето на нивното уставно право на глас.
Во препораката испратена до Министерството за здравство, Централната изборна комисија и Техничкиот комитет на експерти, се бара целосно и итно поништување на одлуката.
– До институцијата народен правобранител, група здруженија на албански емигранти во Грција поднесоа жалба, изразувајќи загриженост за последниот предлог на Техничкиот комитет на експерти за одредување период од две недели за албанските емигранти кои живеат во Грција, ако тие дојдат во Албанија во период на важноста на одлуката – наведува правобранителот.
Според жалбата, оваа предложена мерка го попречува и всушност го негира правото на глас на оние емигранти кои сакаат да го искористат ова основно право на општите парламентарни избори, што ќе се одржат на 25 април 2021 година.
Во жалбата, оваа предложена мерка, исто така, се смета за дискриминаторски третман кон нив, бидејќи на албанските емигранти кои живеат во други земји им е дозволено да влезат во Албанија без да бидат ставени во карантин, додека на албанските емигранти во Грција не.
Ова е само едно од низата барања за укинување на оваа одлука.
Претходно тоа го побара претседателот Илир Мета, кој истата ја смета за сериозен неуставен акт за спречување на албанските емигранти да учествуваат на изборите.
За опозициските политички партии во Албанија, одлуката е намерна „за да се спречи доаѓањето на емигрантите да гласаат на изборите на 25 април“ и истата Партијата Движење за социјалистичка интеграција, на Моника Круемади, ја обжали во Управниот суд.
Пратеникот во албанскиот парламент, Васил Стерјовски, како и Македонското друштво „Илинден“-Тирана, одлуката ја оценија како избрзана и погрешна.
Нивен став е дека одлуката економски ги погодува жителите кои живеат на албанско-македонската граница од Преспа до Голо Брдo, кои, основната егзистенција ја обезбедуваат со сезонска работа и други активности во пограничните региони на Македонија.
ПОВРЗАНИ ВЕСТИ
МИА/Фото: Влада