Министерот за здравство Венко Филипче денеска информираше дека е испратено писмо до сите матични лекари да ги повикаат своите невакцинирани пациенти.
„Денеска испративме писмо до сите матични лекари да ги повикаат своите невакцинирани пациенти. Клучен е опфатот на вакцинацијата. Тоа и почитувањето на превентивните мерки и протколи, се излезот од кризата,“ одговори Филипче на новинарско прашање.
Министерот информираше дека за 25 проценти е зголемен бројот на ковид-случаите, а расте, како што рече, и факторот на преносливост што е јасен индикатор дека ќе има промена на релативно стабилната епидемиолошка ситуација.
Се зголемува и бројот на хоспитализирани пациенти, но добро е, истакна, што нема голем притисок врз болниците.
Според Филипче, во вакцинацијата има стагнација. Граѓаните мора да се свесни дека тоа е единствениот начин за излез од кризата.
Досега се аплицирани над 1,6 милиони дози вакцини против ковид, а нема ризик ако вакцините за ковид и за грип се примат во исто време, подвлече министерот.
Тој уште еднаш апелира да се почитуваат протоколите, да се држи дистанца и да се носи маска. Почнува сезоната на слави, а секаков собир е ризик и затоа треба многу да се внимава.
ПОВРЗАНИ ВЕСТИ
Комисијата за заразни болести ќе се состане во петок, Филипче смета дека не се потребни нови мерки
Филипче не размислува за оставка
МИА/Фото: МЗ