Исплатен е вториот дел од платата за декември лани во Железници на РСМ Транспорт со што машинскиот и извршниот персонал го прекина бојкотот поради кој од вчера не сообраќаа патничките и товарните возови во државава, информира за МИА, Душко Чакаровски, претставник на машинскиот и извршниот персонал.
Чакаровски најави дека со исплатата на платата е исполнето нивното барање и тие се на работните места, а за половина час ќе тргнат возовите согласно дневниот распоред од возниот ред.
Претходно во соопштение од кабинетот на генералниот директор на ЖРСМ Транспорт наведоа дека „прекинот на работата односно штрајкот не е организиран согласно Законот за работни односи и Колективниот договор на ЖРСМ Транспорт АД – Скопје и оти не е предизвикан поради социјален момент или други услови со извршување на работните задачи, туку од лична корист на машинскиот персонал“, кој имал плата со тримесечен просек за периодот 09/2021 година до 11/2021 година во износ од 50.848 денари, тврдење што беше негирано од Чакаровски.
Од претпријатието наведоа дека во услови на пандемија, како и енергетска криза редовно ги исплаќаат платите и надоместоците на вработените, иако друштвото се соочува со намалени приходи, а во исто време и зголемени трошоци по однос на користење на електричната енергија, кој инпут енормно ги зголемува вкупните трошоци во редовното работење.
Со целосниот прекин на железничкиот сообраќај, како што наведоа, им се нанесуваат огромни материјални и нематеријални штети на ЖРСМ Транспорт, ЈП за железничка инфраструктура на РСМ и на целокупното стопанство во државата.
Прекинот на железничкиот сообраќај, како што изјави претходно Чакаровски, е според Одлуката од 2 ноември 2021 година донесена на собир на севкупниот машински и извршен персонал независно од членство во синдикат.
Во одлуката е наведено дека доколку до 25. во тековниот месец не биде исплатена платата во целост на 26. (односно првиот работен ден после 25) со почеток во 07.00 часот машинскиот и извршниот персонал ќе ја бојкотира работата.
ПОВРЗАНИ ВЕСТИ
Втор ден не сообраќаат патничките и товарните возови
МИА/Фото: Влада