Финскиот Парламент денеска го усвои законот со кој на таа земја и се овозможува да стане членка на НАТО независно од Шведска, односно двете земји да не мора истовремено да станат членки на Алијансата.
Усвојувањето на овој закон не значи дека Финска автоматски ќе влезе во НАТО кога Турција и Унгарија ќе го ратификуваат нејзиниот прием во оваа организација, но донесува краен рок до кој Финска ќе чека на соседната Шведска истовремено да влезат во НАТО, пишува „Гардијан“.
Финска во мај минатата година поднесе барање за приклучување кон НАТО.
Турскиот претседател Реџеп Таип Ердоган изјави дека Анкара е подготвена да го поддржи приемот на Финска, но не и на Шведска, бидејќи во таа земја има луѓе кои Турција ги смета за припадници на терористички групи.
Финска и Шведска сè уште чекаат одобрение за приклучување кон НАТО и од Унгарија, чиј Парламент денеска почна расправа за ратификација и може да гласа за одлуката во текот на овој месец.
Финскиот претседател Саули Ниинисто минатата недела изјави дека ќе го потпише овој закон, но дека тоа „од практични причини“ може да почека до изборите во април.
МИА/Фото: Unsplash