Ана Чоловиќ – Лешоска е една од шесте добитници на престижната Голдманова награда за животна средина, која се доделува на активисти ширум светот за зачување на животната средина.
Наградата е позната и како „зелен“ Нобел.
Чоловиќ – Лешоска седум години ја водеше кампањата за стопирање на меѓународното финансирање за две големи хидроцентрали планирани да се градат во најстариот и најголем национален парк на Северна Македонија – Маврово – и со тоа го заштити живеалиштето на речиси исчезнатиот Балкански рис, стои во обрзложението за наградата.
„Во 2015 година, Светската банка ги повлече финансиските средства за еден од хидроенергетските проекти, а во 2017 година Европската банка за обнова и развој го откажа својот заем за Владата на Северна Македонија и за втората хидроцентрала. Ова е прва Голдманова награда за животна средина за земјата“, велат од Goldman prize фондацијата.
Ана Чоловиќ – Лешоска има 39 години, и по професија е биолог.
„Беше мотивирана да ја штити животната средина и да ги вклучи нејзините сограѓани во тој процес. Таа е директор и основач на Центарот за истражување и информирање за животната средина Еко-Свест.
Еко-Свест е основана во 2002 година и работи за да ги заштити националните паркови и културното наследство на Северна Македонија од големите инфраструктурни проекти, да го охрабри учеството на граѓаните во стратегијата за енергетика и да промовира одржлив транспорт, управување со отпад и обновливи извори на енергија.
Чоловиќ – Лешоска е исто така поврзана со Bankwatch, коишто ги истражуваат инвестициите на јавните финансиски институции во развојни проекти“, велат од Фондацијата.