Претседателот на Управниот одбор на НЛБ Банка, Антонио Аргир вели дека порастот на потрошувачки кредити на физички лица од година во година е 9,1 процент, но изненадување се станбените кредити, за кои банките, во услови на ковид-кризата биле песимисти.
„Бевме малку попесимисти кај станбените кредити кои продолжија со супер динамика кога ќе земеме во какви услови работиме и досега невидена криза,“ рече Аргир.
Тој додаде дека немало никакво повлекување на парите од страна на граѓаните од банките, како што тоа било во услови на некои политички или финансиски кризи.
Помошта кај правните лица од страна на НЛБ Банка зависи од случај до случај, а кај физичките лица има одложување на отплатата на кредитите, со тоа што, следниот период оваа мерка ќе се примени само кај оние кај кои, навистина постои потреба или изгубиле работа или им се намалени семејните приходи.
Аргир додаде дека засега НЛБ Банка успешно одговара на предизвиците на ковид-кризата, а нивната анализа покажува дека девет до 10 проценти од клиентите на банката се директно погодени од кризата, до 50 проценти средно, а над 50 проценти слабо погодени, а некои дури имаат и корист заради потрошувачките промени.
Тој смета дека се уште постои неизвесност, колку кризата ќе трае.
ПОВРЗАНИ ВЕСТИ