Министерството за надворешни работи на Бугарија најостро ја осуди изјавата на Драган Ѓуровски од Унијата на млади сили (УМС) на ВМРО-ДПМНЕ, во која тој употребува навредливи и вулгарни квалификации кон Бугарија и кон нејзиниот народ, пренесуваат бугарските медиуми.
„Ние нема да преговараме кој е Гоце Делчев и на кого припаѓаат Илинденците. Дали заборавија на Букурешт од 1913 година, кога ги проширија своите граници на сметка на Македонија и започнаа со асимилација, денационализација и депортација…
Нема да има промена во историјата по волја на татарските фашисти… Оваа одвратна бугарска рака ги удираше Македонците… Тие тврдат дека имаме заедничка историја. Секако дека имаме. Ова е неоспорен факт. Единствената заедничка историја се црвените“, рекол меѓудругото во говорот Ѓуровски, пренесува бугарската агенција БГНЕС.
Според бугарското МНР, ваквите провокации се косат со сите основни европски принципи и норми на политичко однесување.
„Тие се симбол на стереотипите наследени од минатото, кои се во спротивност со декларираното од Република Северна Македонија и желбата на нејзиното општество да ги сподели европските вредности и да се приклучи на заедничкото европско семејство“, се вели во реакцијата на Министерството за надворешни работи .
„Бугарија отсекогаш покажувала конзистентност, транспарентност и конструктивност во односите со соседите. И покрај сите наши манифестации на добрососедство, нашата земја продолжува да биде предмет на демонизација и говор на омраза во домашната политичка дебата во Република Северна Македонија, што е неприфатливо во современиот демократски свет“, посочуваат од бугарското МНР.
Реагираше и македонското Министерството за надворешни работи. Од таму го осудуваат секој говор на омраза, без исклучок, посебно кога неодговорните и непромислени изјави, пораки и квалификации се упатуваат на блиски и соседни држави.
„Северна Македонија се залага за интензивирање и продлабочување на добрососедските односи, и се надева дека вакви изолирани и крајно несоодветни изјави нема да наидат на било какво разбирање кај нашите граѓани“, се вели во реакцијата на македонското МНР.
Фото: Бугарско МНР