Јован Колоски е момче од Македонија но живее во Словенија. Годинава е матурант и може слободно да се нарече чудо на медицината.
Колоски четири години бил во кома, поради автоимуно заболување кое го напаѓа мозокот
„Детето првично беше на Клиниката за детски болести околу еден месец и за една недела падна во прогресивна кома. Првичната дијагноза беше дека има вирусно зафаќање на мозокот, односно летален исход и смрт. Јас го однесов во Словенија преку Марко Покрин кој е мој пријател. Таму беше четири години во кома, и еве го сега матурант“, вели педијатарот Аспазија Софијанова за „еМагазин“.
Кога го однеле во Словенија младите лекари од Клиниката за педијатрија под водство на Анита Огулина не можеле да прифатат дека на детето не може да му се помогне. Тие ја контактирале Клиника за педијатрија во Канада која тестирала некои нови лекови за автоимун енсефалитис.
Полека по пополека тој почнал да седи, да оди, а терапијата траела неколку години. Почнал полека да зборува и да оди.
Благодарејќи на неколку луѓе кои поттикнале хуманитарната акција за собирање средства за лекување на Јован како во Словенија така и во Канада, тој е она што е денес.
Исто така, благодарејќи на случајот со Јован и девојче од Словенија било спасено, бидејќи лекарите можеле да превенираат некои од состојбите, кои веќе им биле познати од Јован.
Јован освен во Македонија, се смета за чудо на медицината и во Словенија.
Фото: Фејсбук-профил на Мирјана Колоска