Луѓето што примиле вакцина против Ковид-19 не треба да прават анализа на антитела, тоа не се прави по ниедна друга вакцина, вели за Факултети, проф. д-р Александар Петличковски, директор на Институтот за имунологија и хумана генетика.
– Антителата се добар, но не се единствениот показател за постоење имунитет кон Ковид-19. Доколку некој има позитивен тест за антитела, тоа сигурно укажува на постоен имунитет, но немањето антитела не значи секогаш дека човек нема имунитет, вели Петличковски и објаснува дека периодот за создавање имунитет по примање на втората доза од вакцината против Ковид-19 е различен во зависност од тоа која вакцина е примена и колкаво е растојанието меѓу двете дози.
– Активацијата на имунолошкиот систем започнува со самото давање на вакцината и таа постепено расте во наредниот период. Најдобар одговор се очекува да биде постигнат неколку недели по давањето на втората доза на вакцината.
Кај модерните, РНК-вакцини, на „Фајзер“ и „Модерна“, како и кај вакцините базирани на аденовируси, како што се руската вакцина и на „АстраЗенека“, максималниот ефект се постигнува 2-3 недели по давањето на втората доза, кај кинеските вакцини за максималниот ефект се потребни околу 6 недели, вели Петличковски и посочува дека создавањето имунитет по вакцинација кај секој човек е различно во зависност од здравствената состојба.
– Генерално, кога човек е здрав, одморен, добро се храни, има функционален и ефикасен имунолошки систем. Доколку има некакви придружни состојби, болести, или можеби прима некаква имуносупресивна терапија, за очекување е дека одговорот на имунолошкиот систем на вакцината ќе биде послаб, вели за Факултети, Петличковски.
ПОВРЗАНИ ВЕСТИ
Доктор Беќаровски: “Синофарм“ е идеална вакцина за тие што прележале Ковид-19, ама има две маани
Фото: МИА/Општина Карпош