Министерот за здравство Венко Филипче демантираше дека над 400 млади лекари ја напуштиле земјава, откако Асоцијацијата на млади лекари и специјализанти излезе со тоа тврдење пред неколку дена.
– Откако излезе таа информација во јавност ние ги проверивме податоците и бројките. Не знам дали станува збор за лажна информација или некој сакал да ја спинува информацијата, но во Лекарската комора издадени се само околу 160 потврди за заминување во странство, а тоа им треба на сите млади или лекари со искуство кои треба да одат да работат макар и привремено, заради тоа што без таа потврда не можат да ги нострифицираат документите во било која држава, рече Филипче.
Вели дека тоа е за 20 потврди помалку од минатата година.
Асоцијацијата на млади лекари и специјализанти изминатава недела излезе со тврдење дека од земјава се иселиле над 400 лекари. Тие формирале и Регистар на лекари кои се надвор од земјава за да ја следат состојбата со нивното иселување.
МИА/Фото: МЗ