Македонецот Виктор Драгомански од Скопје, кој на Малта работел како обезбедувач на угостителски објект вчера е уапсен под сомнение за двојно убиство, објави TVM.
За двојното убиство извршено пред осум дена е осомничен и албанскиот државјанин Даниел Мука.
Досега полицијата на Малта не соопшти детали за евентуалните мотиви за убиството за кое е уапсен и Драгомански.
Жртвите на двојното убиство се партнерска двојка хомосексуалци, Д-р Кристијан Пандолфино и британец со полско потекло, Ивор Мациејовски.
Двајцата се убиени пред осум дена. Едниот е најден на првиот кат во заедничкиот дом, додека телото на втората жртва е откриено на вториот кат во куќата во градот Слиема во Малта.
Жртвите биле во врска четири години.
Пандолфино бил лекар кој се префрлил во друга дејност и сега се занимавал со инвестирање во банки и фондови, а Мациејовски бил дилер и продавач на дела од современа уметност.
Според медиумите во Малта полицијата првично се сомневала на грабеж кој тргнал на лошо, но истрагата покажала дека се работи за смислено и нарачано убиство, што го потврдил и Мука во изјава.
На снимките од надзорните камери, се гледаат две лица како со оружје бегаат од куќата во која се случило убиството. На самото место, биле пронајдени шест чаури, а обдукцијата покажала дека Пандолфино бил застрелкан со четири куршуми, а Мациејовски е усмртен со еден истрел во главата.
На Јутјуб се појави и снимка од акцијата за приведувањето на Мука:
Медиумите во Малта повикувајќи се на извори блиски до истрагата објавија дека форензичките тестови на предметите пронајдени во автомобил користен при бегството, ја одвело полицијата до Мука. Подоцна и неговите отпечатоци се пронајдени во автомобилот и споредени со оние најдени од местото на злосторството.
Според тамошните медиуми, Драгомански се криел во хотелот Гзира, каде бил уапсен.
Фото/видео: maltastory/TVM/Фејсбук/Драгомански