Речиси и да нема ден во изминатиов период во кој граѓаните не се изложени на информации кои предизвикуваат стрес и интензивен страв, кој ако трае подолг период лесно преоѓа во параноја.
Енормно загадување, епидемија на болести, предупредувања за опасност од терористички напади, зачестена појава на случаи на исчезнати лица се само дел од огромниот број таканаречени црни вести кои се секојдневно присутни во јавноста.
Истовремено, на политичката сцена има промени кои се од историско значење какви што се преименувањето на државата и забрзувањето на процесот на зачленување во НАТО, но и многубројните политички скандали кои ги придружуваат овие моменти.
Во теоријата е познато дека држењето на луѓето во постојан страв или блага параноја од нив прави подобно политичко месо.
Без да се навлегува во прашањето на теории на заговор, факт е дека поклопувањето на овие настани негативно влијае врз граѓаните, бидејќи голем број од нив се чувствуваат несигурно. На тоа влијае и бавната разрешница кај голем број од ваквите случаи.
Се чини дека власта е позафатена со избор на кандидат за претседателските избори и други политички прашања и не гледа дека поради страв да излезат на јавни места и меѓу луѓе голем број од гласачите ќе останат дома, така што лесно може да се случи на изборите да нема цензус.
ПОВРЗАНИ ВЕСТИ
„Не збори со непознати“, така ги испративме децата утрово на школо