На денешното рочиште за „Рекет“ се слушаат аудио-разговорите што бизнисменот Орце Камчев, сведок во случајот и ги предал на обвинителката Вилма Русковска.
Дел од нив се однесуваат на она што јавноста до сега имаше можност да го слушне, а дел се нови.
На една од аудио-снимките се слуша како Камчев му вели на првообвинетиот Бојан Јовановски-Боки 13 дека парите ги броел два часа и внимавал куферчето да му одговара со стајлингот.
„Не бива у торба адидас да се,“ вели и гласно се смее.
Во разговорите се слуша и за сумата која треба да биде исплатена, постапките кои треба да следат од страна на поранешната специјална јавна обвинителка Катица Јанева, како и враќањето на пасошот.
Адвокатите на Јовановски и на второобвинетата Јанева, ги оспоруваат снимките. Нивното образложение е дека немаат ниту датум, ниту време и дека не може да се докаже кој со кого разговара.
Случајот „Рекет”, го води Кривични совет предводен од судијката Васка Николовска-Масевска, а обвинението го застапува шефицата на Обвинителството за борба против организираниот криминал и корупција, Вилма Рускоска.
Јовановски се сомничи дека сторил кривично дело „перење пари и други приноси од казниво дело“, а Јанева и Милески за „примање награда за противзаконито влијание“.
Јанева се товари и дека сторила и кривично дело „злоупотреба на службена положба и овластување“.
На првото рочиште за „Рекет“, што се одржа на 3 декември, третообвинетиот Зоран Милески-Кичеец призна вина, по што беше осуден на три години затвор.
Фото: МИА
ПОВРЗАНИ ВЕСТИ