ДУИ останува на ставот дека Македонија треба да има консензуален претседателски кандидат и оти предвремни избори не се во интерес на државата, изјави денеска вицепремиерот за европски прашања Бујар Османи.
-Начелно имаме прелиминарен договор со СДСМ дека на овие избори ќе излеземе со заеднички кандидат. Сме разговарале и за одредени имиња за кои се шпекулира во јавноста, меѓутоа немаме договор досега во однос на тоа кој ќе биде кандидатот. Очекуваме да разговараме и за конкретни имиња, меѓутоа ДУИ останува на ставот дека Македонија треба да има консензуален претседател, рече Османи.
Тој нагласи дека оваа идеја ја застапуваат од 2014 година, опстојуваат на неа и денес и ќе продолжат да ја застапуваат и во наредните мандати ако не успеат сега.
Во однос на предвремени парламентарни измени, Османи нагласи дека партискиот интерес е да има парламентарни избори денеска-утре, бидејќи досега немале таква можност за силна победа како сега, но оти тоа не е државен интерес, туку завршување на процесот за отпочнување претпристапни преговри.
Запрашан во однос на тоа кои се прифатливи кандидати за ДУИ, Османи рече дека е рано да се разговара за тоа, подвлегувајќи го партискиот став оти сметаат дека кандидатот треба да ги надмине етничките и партиските линии, но, доколку има добар кандидат, и во рамки на партиите, ние сме подготвени да разговараме.
-Мислам дека е рано да разговараме за имиња, бидејќи го компромитираме процесот, граѓаните да го кажат прво своето мислење во различни испитувања на јавното мислење, рече Османи, запрашан дали Шекеринска и Спасовски се прифатливи кандидати за ДУИ.
МИА/Фото: Влада
ПОВРЗАНИ ВЕСТИ
СДСМ ќе пресече: Ќе има ли предвремени парламентарни избори