Почина бизнисменот Кирил Самарџиоски, долгогодишен директор на „Прилепска пиварница“.
Претседателот на Стопанската комора на Северна Македонија Бранко Азески, упати телеграма со сочувство до семејството Самарџиоски по повод смртта на Самарџиоски, еден од најдолгогодишните соработници и активни членови во највисоките органи и тела на Стопанската комора на Северна Македонија, информираат од таму.
-Претседателот Азески, истакна дека Стопанската комора на Северна Македонија е горда што во својата постава имала човек кој со својата работа и искуство, низ годините значително придонел за раст и развој на економијата и бизнис секторот во државата, велат од Комората.
Кирил Самарџиоски, беше реномиран бизнисмен, кој својот 45 годишен работен век во пиварската индустрија го започнува во далечната 1967 година.
Во своето долгогодишно работно искуство остави зад себе низа успеси и постави основ врз кој „Прилепска Пиварница“ се изгради во светски реномирана и насекаде препознаена компанија.
За своите заслуги и залагања, во 2014 година станува добитник на Третоноемвриската награда за животно дело.
Во 2016 година, во просториите на Стопанската комора на Северна Македонија беше одржана и промоција на монографијата „Сеќавања“ за Прилепска пиварница.
-Поттикнат од самите почетоци на работењето на компанијата, Самарџиоски со многу факти, податоци, информации корисни за самата фабрика, но и за економијата на нашата земја, даде осврт преку текст и слики преточени во книга, пишувана неколку години, од срце инспирирана од првиот ден на почетокот на неговата работа, преку предизвиците со кои компанијата се соочила низ времето и достигнувањата и позицијата на компанијата во која се наоѓа сега, велат од Комората.
Фото: ССК