По кратко боледување, денеска во Скопје, на 60-годишна возраст, почина Марко Зврлевски, поранешен Јавен обвинител на Република Македонија, соопштија од Обвинителството.
Зврлевски беше роден на 04.12.1960 година во Дебар. Основно и средно образование заврши во Скопје, а дипломираше на Правниот факултет „Јустинијан Први“ при Универзитетот „Св. Кирил и Методиј“ во Скопје.
Работното искуство го започна во Македонската академија на науките и уметностите (1988-1989 година), по што кратко време работеше како новинар во Македонската радио телевизија.
Од приправник по правна струка во тогашното Општинско јавно обвинителство во Скопје (1989-1991 година), преку стручен соработник (1991-1998 година), адвокат од областа на казненото право (1998-2000 година), заменик-јавен обвинител во Основното јавно обвинителство – Скопје (2000-2005 година), Зврлевски речиси целата своја кариера ѝ ја посвети на јавнообвинителската работа.
Во декември 2005 година беше распореден во Одделението за гонење на сторители на кривични дела од областа на организираниот криминал и корупција, а по трансформирањето на одделението, беше избран за јавен обвинител во Основното јавно обвинителство за гонење на организиран криминал и корупција.
Од ноември 2009 до јануари 2013 година како Основен јавен обвинител раководеше со Основното јавно обвинителство – Скопје. Во јануари 2013 година беше именуван за Јавен обвинител на Република Македонија која функција ја извршуваше до август 2017 година.
Од 2009 до септември 2015 година беше претседател на Здружението на јавни обвинители на Република Македонија.
Порталот а1он.мк пренесе декаЗврлевски починал како последица од Ковид-19.
Фото: Академик