Вчера во Македонија беа регистрирани два смртни случаи на лица заразени со коронавирусот.
Подоцна во текот на денот почина и родилката од Куманово, која беше заболена од коронавирусот.
“Регистрирани се 2 смртни случаи од COVID-19 во текот на изминатите 24 часа.
Се работи за заболено лице од Куманово и странски државјанин регистриран во Кавадарци.
Се работи за машки лица на возраст од 44 и 73 години.
Кај починатото лице од Куманово се присутни симптоми на заболувањето, коморбидитети (хронична/здравствени состојби, н.з.) и бил хоспитализиран на Клиниката за инфективни и фебрилни состојби во Скопје (КИБФС).
Странскиот државјанин е со престој во државата во период од 4 месеци“, стои во анализата на податоците од страна на Институтот за јавно здравје (ИЈЗ).
Порталот ТВ Нова објави дека тој бил албански државјанин и дека работел во градежништвото.
Од Министерството за здравство пак вчера информира дека лицето кое починало во Кавадарци е пронајдено мртво во неговиот стан. Кај него постмортем е земен брис и истиот потврдил присуство на корона вирусот.
Родилката од Куманово пак имаше само 27 години.
“Таа на 30 март на Клиниката за гинекологија и акушерство во Скопје роди недоносено машко новорoденче, негативно на вирусот.
Родилката беше префрлена на Инфективната клиника на 31 март поради влошена клиничката слика и отежнато дишење. И покрај напорите на лекарите, брзиот и агресивен развој на болеста беше фатален.
Клиниката за гинeкологија и акушерство информира дека бебето е во добра состојба, се уште е на интензивна нега и под постојан надзор на тимот од клиниката“, информираа од Министерството.
ПОВРЗАНИ ВЕСТИ
Детален преглед: Број на починати и заболени со коронавирусот во Македонија по градови
Двајца странски државјани досега починаа од коронавирусот во Македонија
(Фото) Синот на српскиот претседател Вучиќ заболен од коронавирусот
Фото: Општина Кавадарци