На државно ниво, преносливоста на омикрон сојот се намалува, во многу земји веќе е достигнат врвот, што значи дека има шанси и за нас во следните десетина дена, вели проф. Дејан Трајковски во неговата најнова анализа за ковид-состојбата во земјава.
„Од друга страна, стапката на позитивни тестови сé уште забрзано се искачува и денеска надмина 30%. Можно е ограничениот број на тестирања да ни дава многу искривена слика, но во понеделник, со објавувањето на бројот на хоспитализираните ќе добиеме поточна претстава.
Доколку стапката на хоспитализираност продолжи да се намалува (или барем остане иста), тоа би значело дека сепак со тестирањата држиме каков-таков чекор и дека со помош на бројот на новозаразени можеме да го предвидуваме трендот.
Утре или во сабота ги очекуваме податоците за вакцинираните, поточно нивното учество во бројот на новодијагностицираните и починатите. Претходната недела не беа објавени податоци, а истите ќе ни беа дргоцени, затоа што преку падот на ефективноста на вакцините против заразување (слично како што видовме пред неколку дена кај падот на ефективноста од прележувањето) ќе добиевме подобра претстава за нивното дејство против омикрон сојот.
Не треба да се изненадиме во сабота ако ефективноста на вакцините против заразување од 13% опаднала на 0% во овие две недели. Но, многу поважна ќе биде ефективноста на вакцините против смртен исход.
Да се надеваме дека барем таа нема многу да се намали, иако гледаме дека леталитетот и морталитетот во целата популација последниве две недели се многу намалени (моментално леталитетот изнесува само 1,18%),“ пишува Трајковски на Фејсбук.
ПОВРЗАНИ ВЕСТИ
Фото: Фејсбук/Трајковски