ПР експертот и основач на Пи Ворлд, Коста Петров викендов е предавач на последниот модул „Принципи на феминистичко лидерство и јавност“ од програмата „Future is Feminist“.
Петров, во своето излагање потенцираше дека една жена сама не може да направи општествена промена, туку потребно е жените да се поврзат меѓусебе, да се бодрат и да бидат поддршка една на друга. Тој истакна дека комуникацијата е најважна за било која професија, особено за девојките и жените што сакаат да ги зајакнат своите лидерски способности, да основаат сопствен бизнис или да се активираат во политиката.
Во делот на комуникацијата со јавноста, Петров информираше дека првите 8 секунди се клучни за привлекување на вниманието без разлика дали станува збор за видео, соопштение или ПР текст.
Денеска, јавноста го чита само насловот и првиот пасус од текстот, и доколку од самиот
старт не се заинтересира јавноста за вашата приказна тогаш содржината ќе остане само на веб-страницата на организацијата и компанијата.
На модулот, тој презентираше студија на случај за историскиот успех на Евровизија кадешто Македонија во 2019 година го освои второто место. Петров истакна дека многу е важно да се активираат вистинските луѓе коишто веруваат во вашата идеја и визија.
Петров посочи дека програмата „Future is Feminist“ ги учи девојките како да ги усовршат своите вештини во застапување и активизам со цел создавање позитивна и трајна промена на подобро.
„Феминистичкото движење е моќна сила за напредок, која се бори за поголема родова еднаквост во сите аспекти на животот и настојува да ги предизвика и промени системските бариери кои ги спречуваат жените да напредуваат во општеството“, рече Петров.