Членот на Претседателството на Босна и Херцеговина, Шефик Џаферовиќ телефонски разговараше со словенечкиот премиер Јанез Јанша, кој го информирал дека не постои нон-пејпер што може да биде поврзан со словенечката Влада, а би вклучувал прекројување на границите, или повреда на територијалниот интегритет на Босна и Херцеговина.
Јанша, кој, како што соопшти Претседателството на БиХ го иницирал телефонскиот разговор, рече дека Словенија го поддржува суверенитетот и територијалниот интегритет на Босна и Херцеговина, како и нејзиниот евроатлантски пат, целосно почитувајќи го Дејтонскиот мировен договор.
Џаферовиќ рече дека во старт треба да се спречи секаква приказна за етнички и територијални поделби на Босна и Херцеговина, и додаде дека единствен пат за БиХ е нејзината понатамошна внатрешна реинтеграција и евроатлантска интеграција.
Според порталот Кликс, тие разговарале за претседателството на Словенија со Европската унија во наредниот период, како и за претстојниот самит на Европската унија и Западен Балкан, на кој Словенија ќе биде домаќин и чија главна тема треба да биде забрзувањето на интеграцијата на земјите од Западен Балкан во Европската унија.
Кликс потсетува дека информациите за словенечкиот нон-пејпер, кој третира прекројување на границите на Западен Балкан крена голема прашина во регионот во последните денови.
ПОВРЗАНИ ВЕСТИ
Јанша му кажал на Мицкоски дека нон пејпер креирале Заев, Фајон и Пицула
Пендаровски: Секое прекројување на гранците на Балканот ќе донесе дестабилизација на регионот
МИА/Фото: Јанша/Фејсбук