Директорката на Универзитетска клиника за инфективни болести и фебрилни состојби – Скопје, Милена Стевановиќ за текот на вакцинацијата, која почна со Спутник V, како и ревакцинацијата со Фајзер кај здравствените работници, во интервју за МИА вели дека засега нема пријавено некои поголеми несакани ефекти од двете вакцини.
Имало алергиски реакции, но навремено и соодветно се реагирало.
„Она што е информација која јас ја имам, а која е официјално и на веб-страната на МАЛМЕД се пријавува од страна на примателите на вакцината, дека практично немаме некои поголеми несакани ефекти или реакции од вакцините, вклучувајќи ја и таа на Фајзер и оваа на Спутник, со која е отпочното вакцинирањето.
Процесот оди глатко, брзо, многу добро организирано и тоа е еден од најзначајните елементи за спроведување на успешен процес на вакцинација.
Забележани се некои алергични реакции, за кои е реагирано соодветно како што треба и јас мислам дека ваквиот систем на вакцинирање, добро организиран процес на вакцинирање, ќе придонесе да истото успешно го спроведеме врз целата популација,“ вели Стевановиќ.
Таа вели дека вакцинацијата е добро организирана и засега тече без проблеми, но предупредува дека со примањето на вакцината не значи дека граѓанинот е веднаш заштитен. Секоја вакцина е различна и оние што ги имаме моментално и оние кои се очекуваат, потребен е различен временски период за да се стекне имунитетот, а Стевановиќ апелира секој што ќе прими вакцина да продолжи да ги почитува мерките.
„Ние сме сведоци на известувања од целиот свет каде што е почнат процесот на вакцинација дека има голем број на луѓе кои после давањето на првата вакцина пројавиле симптоми и биле позитивни.
Тоа само значи дека не се дочувале во периодот по вакцинирањето и не ги применувале мерките,“ вели Стевановиќ.
МИА/Фото: МИА