Градоначалникот на Општина Гостивар и генерален секретар на Алијанса за Албанците, Арбен Таравари во гостувањето на телевизија Сител, рече дека власта ѝ нудела пари на пратеничка од неговата партија за да премине во актуелното парламентарно мнозинство.
„Во оваа држава сѐ може да се направи. Пратеничката добила понуда од другари на премиерот. Ова е циркус-држава,“ рече Таравари.
По повод оваа изјава на Таравари од владината прес-служба стигна соопштение во кое се вели дека „премиерот Зоран Заев најостро ги демантира изнесените лаги и дезинформации дека наводно тој или било кој друг по негова насока нудел пари на пратеници“.
„За оваа груба манипулација, лага и клевета ќе бидат преземени сите правни дејствија низ правосудните институции доколку господинот Таравари веднаш јавно не ја повлече изнесената клевета и доколку јавно не се извини,“ соопшти Владата.
Фото: Фејсбук/Таравари