Според денешните официјални податоци на Министерството за здравство во Дебар и во последното деноноќие нема новозаразени со Ковид-19.
Тоа значи дека новодијагностицирани во Дебар и Центар Жупа нема во изминатите девет дена, па бројот на заразени останува на 49 лица. Од нив две се од Општина Центар Жупа, односно првозаразените сопружници, кај кои болеста беше дијагностицирана по нивното пристигнување од Италија.
Последно соопштените податоци говорат дека 23 од заразените се излекувани, додека за жал четворица починаа, од нив тројца мажи од Дебар и жена од Центар Жупа.
Жителите од двете општини строго ги почитуваат и препораките и мерките на надлежните.
– Во двете општини строго се почитува мерката за забрана за движење. Повеќе од десет дена не е регистрирано непочитувања на одлуката за забрана за движење. Полициските службеници реализираат мото-патроли низ градските средини и приградските населби.
Притоа, не се регистрирани собирања на граѓани на јавни места, нема нарушувања на јавниот ред и мир и нема регистрирани сообраќајни незгоди, изјави Стефан Димоски, портпарол на Секторот за внатрешни работи од Охрид
Упати апел за совесно и дисциплинирано придржување до сите останати препорачани мерки и насоки во врска со спречувањето на ширењето на коронавирусот, а сите правни и физички лица строго да се придржуваат до насоките на полициските службеници.
Во продолжениот полициски час, улиците во двете општини се празни. Ретко може да се види само по некој земјоделец кој со потребната механизација извршува подготвителни работи за пролетната сеидба.
МИА/Фото: Општина Дебар
ПОВРЗАНИ ВЕСТИ
(Мапа) Кумулативната инциденца во Куманово над 127, расте и во Штип и Кочани