Во Општата болница со проширена дејност во Дебар, почина повозрасен пациент, кој десеттина дена бил хоспитализран, што е деветта жртва од опасниот вирус овој месец.
Директорот на оваа установа, Баки Алили, за МИА потврди дека бројот на хоспитализирани е 29 пациенти, при што над 86 отсто се на кислородна подршка.
-Во ковид центарот во инфективното одделение хоспитализирани се 18 пациенти, сите на кислородна подршка. Во хирушкото одделение, кое од пред неколку дена, поради потребата од хоспитализации е пренаменето за ковид пациенти, болнички се третираат 11, од нив седум се на кислородна подршка. Од вкупната бројка 20 отсто се помлади од 45 години, изјави Алили.
Додава дека дневно амбулански се лекуваат 20 лица, кои по добиената терапија, малку одмораат и заминуваат во своите домови.
Според официјалната статистика вкупната бројка на заразени, во оваа и општина Центар Жупа, од почетокот на пандемијата е 1.210, од кои овој месец 247, а моментно активни на болеста се 201 лице.
Директорот Алили, исто така рече дека процесот на вакцинација продолжува непречено и оти денеска аплицирани се над 300 вакцини, главно Фајзер, за која се определува помладата популација.
ПОВРЗАНИ ВЕСТИ
Најмногу во Тетово и Гостивар: Околу 700 хоспитализирани поради компликации од Ковид-19
Од Ковид-19 во Гостивар починаа две лица, 68 пациенти на кислородна подршка
МИА/Фото: МЗ