Корона вирусот почна да влегува во училиштата и детските градинки на територијата на Општина Гевгелија.
Градоначалникот Сашо Поцков по седницата на штабот за заштита и спасување информира дека во основното училиште „Владо Кантарџиев“ во Гевгелија, во консултација со епидемиолог, едно одделение е во изолација.
– Во основното училиште „Владо Кантарџиев“ во Гевгелија,во консултација со епидемиолог, едно одделение отиде во изолација. Во основното училиште во Миравци една наставничка, и покрај тоа што не е позитивна на Ковид-19, остана во превентивна самоизолација, а во училиштето во Негорци еден наставник е во изолација но образовниот процес со физичко присуство на учениците продолжува нормално, рече Поцков.
Тој истакна дека згрижувањето на децата во детските градинки се одвива строго според донесените протоколи за работа, но и таму поради едно заболено дете од градинка во Гевгелија, во изолација заминаа негувателката, воспитувачката и целата група составена од 15 дечиња.
Поцков апелираше до граѓаните дисциплинирано да ги применуваат мерките за заштита од ширење на вирусот, донесени од Владата и Министерството за здравство, особено оние за лична и колективна заштита, како и одржувањето на социјална оддалеченост.
МИА/Фото: Влада