Сите 39 кревети наменети за лекување на ковид-пациенти во струмичката болница се полни, а секојдневно на амбулантско лекување доаѓаат и дваесетина пациенти со полесна клиничка слика, информираше денеска директорот на болницата, Наќе Гогов.
-Капацитетот на Инфективното одделение од 20 кревети од порано е исполнет, а од вчера и ковид центарот со капацитет од 19 кревети е полн. Засега успеваме со нашите ресурси да одговориме на потребите на пациентите, но доколку и понатаму продолжи трендот на зголемен број на новозаразени ќе мораме да ги прошируваме капацитетите, рече директорот Гогов.
Заради недостиг од медициски персонал деновиве раководството на болницата побарало од ресорното министерство да дозволи распоредување на дополнителни десет лекари од други болници во државата и прием на шест медицински сестри.
-Доколку нема средства за прием на нови сестри, тогаш да ни дозволат да ги ангажираме со договор на дело за да можеме да функционираме, додаде Гогов.
Инаку, досега на подрачјето кое го покрива Центарот за јавно здравје во Струмица, се регистрирани 558 лица со Ковид-19, а во моментов активни се 358 случаи на различна возраст.
ПОВРЗАНИ ВЕСТИ
Хоспитализирани само 7,3% од новозаразените со Ковид-19
Во Општата болница во Кочани отворено Ковид одделение, згрижени првите пациенти
На возраст од 30 до 39 години, најмногу од новозаразените со Ковид-19
МИА/Фото: МЗ