Истражувањето на Центарот за граѓански комуникации (ЦГК) „Недоволна транспарентност и ниски цени при продажбата на државно градежно земјиште“ открива дека oпштините не ги информираат граѓаните за реализираните продажби на државно градежно земјиште, а истото се продава по ниски цени.
Истражувањето покажува дека општините ги објавуваат одлуките за отуѓување на државно градежно земјиште само во Службен весник, но, ниту една од мониторираните општини не преземала други активности за информирање на граѓаните, односно донесените одлуки за продажба на земјиште и склучените договори со купувачите не ги објавуваат ниту на своите веб-страници.
-Нетранспарентноста оди дотаму што дел од општините не ги доставија склучените договори ниту преку барање за пристап до информации од јавен карактер. На овој начин се оневозможува информираност на граѓаните и се зголемува ризикот од злоупотреби, велат од ЦГК.
Според истражувањето цената за 1 метар квадратен државно земјиште во изминатите пет години се движела од 71 до 18.400 денари (од 1,2 до 299 евра).
Просечно, во постапките за продажба на државно градежно земјиште учествувале по 4 потенцијални купувачи.