Две фирми за игри на среќа може да останат без дозвола за работа. Не е познато за кои фирми се работи, а и двете се надвор од Скопје
Како што соопшти министерката за финансии Гордана Димитриеска Кочоска, двете фирми должат големи износи кон државата.
– Двете друштва не платиле ниту една од давачките по основ на повеќе закони во период од неколку години со што најверојатно ја оштетиле државата.
Едно од друштвата е формирано во 2022 година и од тогаш не платило ништо, иако има обврски кои произлегуваат од Законот за игри на среќа од законите за одредени даноци, како и придонеси за вработените, изјави вчера Димитриеска Кочоска, која информираше дека Министерството за финансии ги испратило предметите за фирмите до Финансиската полиција и до Министерството за внатрешни работи, кои треба да утврдат дали и во колкав обем е оштетена државата од незаконското работење на фирмите..
На овие информации реагираа од Асоцијацијата на спортски обложувалници на Македонија (АСОМ), од каде посочија дека нивните членки секогаш работеле според законот.