Еуролинк осигурување ја лансира новата онлајн платформа Еуролинк360о, дизајнирана да им овозможи на клиентите целосен увид и безбедно управување со сопственото осигурително портфолио, информираат од компанијата.
„Оваа современа платформа обезбедува лесно и брзо онлајн пријавување на штети по сите полиси, пратење на статусот на пријавената штета онлајн во реално време, целосен преглед на сите фактури и управување со начините за плаќање, обнова на полиси како и унапредување на функциите што веќе беа достапни за нашите клиенти – усовршен систем за е-плаќање и нов, јасен и брз веб шоп за е-полиси.
Сите овие функционалности ги претставуваат сите осигурителни потреби на нашите клиенти – сега достапни на едно место. Оттука произлезе и името на платформата, односно симболиката на 360 степени, што асоцира на целосно заокружено, подобрено искуство, во секоја точка од нашите достапни услуги,“ се вели во соопштението.
Секој нивен клиент, физичко лице, има можност да се верификува на Еуролинк360о и со тоа да си овозможи преглед и управување со своето осигурување.
„Најважна функција која ќе понуди исчекор во осигурувањето е онлајн пријавата на штета со целосно дигитално управување со документите и пратењето на статус на штета. Пријавата на штета отсега е целосно автоматизиран и дигитализиран процес зад кој стои современа технологија, со што значително се олеснува и скратува процесот на пријава и регистрација на штетата во системот на Еуролинк осигурување.
Клиентот веднаш добива број за пријавената штета и можност преку електронски тракинг систем да го прати процесот на обработка. Нашите клиенти транспарентно ги добиваат сите потребни нотификации електронски во реално време. Клиентите се во целосна контрола и управуваат со процесот, што ќе овозможи подобра услуга во секој момент,“ додаваат од компанијата.
Претседателката на Управниот одбор на Еуролинк осигурување Марија Томеска изјави дека во Еуролинк осигурување, постојано бараат начини да ги подобрат нивните процеси и да обезбедат врвна услуга за нивните клиенти.
„Денеска правиме чекор напред кон целосно клиентски ориентирано искуство во осигурувањето што е дел од иднината. Еуролинк360о е сеопфатна платформа за сите осигурителни потреби која осигурувањето го става целосно во рацете на клиентите.
Платформата е дел од нашата стратешка определба за обезбедување на сестрана клиентска поддршка преку мултипни канали и решение за клиентите кои преферираат самостојно следење и менаџирање на своето осигурително портфолио во секое време.
Со нашата иновативна платформа овозможуваме целосно транспарентен и достапен систем за следење и менаџирање со осигурителното портфолио, што значи дека клиентите можат сами да го прегледаат своето портфолио, да обновуваат и купуваат осигурување, да сетираат начин на плаќање и да платат, како и да пријават и следат штета – сè на едно место.
Вложивме исклучителни напори во последната година да ја развиеме и лансираме Еуролинк360о – платформа која ќе понуди целосно ново и максимално подобрено искуство во осигурувањето. Платформата ги прати трендовите во дигитализацијата и зголемената желба на нашите клиенти да бидат во сопственост на своите податоци и самостојно да ги контролираат процесите,“ изјави Томеска.
Еуролинк осигурување продолжува да биде достапна преку сите останати канали на комуникација, но веруваме дека со оваа нова алатка нашите клиенти ќе бидат дополнително опремени со сè што им е потребно за транспарентно и лесно управување со процесите за осигурување, велат од таму.