Основното јавно обвинителство оформило предмет за поранешниот функционер на опозициската ДУИ, Артан Груби и судијата од Апелациониот суд Скопје, Енвер Беџети, откако двајцата се најдоа на „црната листа„ на САД, бидејќи како што информираа од Стејт департментот биле поткупени да влијаат врз судските процеси за поранешниот прв човек на Управата за безбедност и контраразузнавање (УБК), Сашо Мијалков.
Државниот јавен обвинител Љупчо Коцевски, кој го оформил предметот, денеска информираше и дека Обвинителството ќе истражува и кој ги поткупил Груби и Беџети.
– Со оглед на сериозноста на наводите поради кои наведените лица беа назначени на листата, ги искористив своите овластувања и уште вчера оформив предмет со цел да се обидеме да обезбедиме докази со кои ќе ја провериме евентуалната кривична одговорност на лицата кои се доведуваат во врска со дејства на поткуп и трговија со влијание, рече Коцевски на брифинг со новинарите.
Предметот е доставен на постапување на надлежно Обвинителство кое ќе издаде соодветни наредби до институциите за откривање на кривичните дела.
ПОВРЗАНИ ВЕСТИ
Каков имот пријавил судијата Енвер Беџети, кој со Артан Груби е ставен на „црната листа“ на САД
Каков имот пријавил Артан Груби, кој е ставен на „црната листа„ на САД