Полицајци од обезбедувањето на претседателката Гордана Сиљановска Давкова, на 22. март лажно тврделе дека возилото “порше“ на Срѓан Керим, поранешниот министер за надворешни работи и поранешен македонски амбасадор во Обединетите Нации, е службено.
Неговото возило тогаш непрописно беше паркирано на велосипедска патека пред угостителски објект во скопско Дебар Маало, а по реакција на граѓани беше кренато од пајак служба..
ПОВРЗАНИ ВЕСТИ
Срѓан Керим се паркирал непрописно во Дебар Маало
Од Министерството за внатрешни работи (МВР) информираа дека за нив е покрената дисциплинска постапка и споделија повеќе информации за настанот.
„По извршен увид во службената документација, констатирано е дека полицискиот службеник С.Н. од ОБПС Скопје, на 22.03.2025 постапувал по наредба за вршење дејност за непрописно паркирани возила.
Од страна на граѓанинот С.Н., на телефонскиот број 192 било пријавено дека на улица ‘Орце Николов’, во близина на ресторан, непрописно било паркирано возилото ‘порше каен’“, велат од МВР.
ПОВРЗАНИ ВЕСТИ
(Видео) Граѓани натераа пајак служба да крене неправилно паркирано „порше“
Полицаецот се упатил таму во придружба на пајак-возило и двајца вработени во Јавното претпријатие за јавни паркиралишта на Општина Центар. Таму го затекнале непрописно паркираното возило и групата револтирани граѓани кои барале автомобилот да биде отстранет оттаму.
Тогаш, како што велат од МВР, од угостителски објект во близина излегле две лица кои се легитимирале како полициски службеници, тврдејќи дека возилото е службено.
„Полицискиот службеник С.Н. им наредил веднаш да го отстранат возилото и да го паркираат на соодветно место, по што влегол во кабината на пајак-возилото со цел да провери дали возилото навистина е службено.
Откако утврдил дека возилото не е службено и дека сè уште не е отстрането, на вработените од ЈП за јавни паркиралишта им дал наредба да го подигнат возилото, по што истото било пренесено во депото“, велат од таму.
Таму друг полицаец направил записник за сторен сообраќаен прекршок и издал платен налог во кој како сторител на прекршокот е наведен С.К. (76) од Скопје. Сопственик на возилото, пак, е извесен М.Т. (48) од Скопје, велат од МВР.
„Двете лица кои се претставиле како полициски службеници и тврделе дека возилото е службено, со патничко возило ‘форд мондео’ се упатиле кон депото.
Полициските службеници од Одделот за внатрешна контрола, криминалистички истраги и професионални стандарди извршиле проверки за возилото ‘форд мондео’ и констатирале дека истото го управувале полициските службеници Т.Д. и И.С., распоредени во Одделението за лично обезбедување на Претседателот на РМ“, велат од МВР.
За двајцата полицајци е констатирано дека сториле потешко прекршување на работниот ред и дисциплина.
ПОВРЗАНИ ВЕСТИ
Полицијата, а не ПОЦ, одбивала да го подигне возилото во Дебар Маало, велат од Општина Центар