„Танец“ ја заокружи прославата на 70-годишниот јубилеј со концерт во МНТ, на кој дадоа се од себе за во најдобро светло да се претстават пред македонската публика. И уште еднаш покажаа и докажаа зошто се едни од најдобрите промотори во светот на македонската култура и традиција.
Низ нивната уметност во играта, се гледа нивната секојдневна макотрпна посветеност, за на сцена да го дадат најдоброто од себе.
Низ нивната игра се гледаат илјадници часови вежбање, животни одрекувања, намерата да се биде се подобар во тоа што се работи. Нивната позитивна енергија публиката и тоа како ја почувствува. Оттука, сите награди во светот и громогласни овации даваат смисла на нивната работа. Публиката ги наградува со најискрени емоции и затоа долго ќе се памети тоа што „Танец“ го приреди на сцената на МНТ.
Овој концерт беше посебен и за првенецот на „Танец“, Снежана Балканска која целиот работен век го помина во ансамблот, а членовите на сцената на МНТ и посакаа среќно пензионирање. Нејзиниот придонес ќе остане вткаен во работата на „Танец“ и во иднина. Приказната ќе ја продолжи нејзиниот син Костадин.
Пред концертот, беше промовирана и монографијата, а признанија добија и нивните верни поддржувачи со кои, полесно се функционира. Гости на „Танец“ беа „Коло“ од Србија, кои ја збогатија вечерта со нивната фолклорна музичка традиција.
