Случајот „Титаник“, кој се уште е во фаза на доказна постапка, продолжува на 29 септември.
Во текот на денешното рочиште за случајот за изборни нерегуларности, сведокот Наќо Николовски од Кичево изјави дека е член на ВМРО-ДПМНЕ од 90-те години на минатиот век и секогаш донирал парични средства во партијата, но тоа го има правел во Општинскиот Комитет на ВМРО-ДПМНЕ во Кичево, а не во банка.
– Никогаш не сум уплатил во банка во име на партијата, меѓутоа секој месец сум донирал во штабот на ВМРО-ДПМНЕ, во ОК-Кичево. Највисока сума што сум ја донирал беше 20 илјади денари во 2011 година пред изборите, а пред тоа сум плаќал членарина од две-три илјади денари. До моментот кога бев повикан во СЈО, не знаев дека во мое име е исплатен износ од 60 илјади денари. Уплатницата ја видов при распитот и потписот не беше мој, рече сведокот Николовски.
На прашање на обвинетиот Илија Димовски, дали бројот на лица кој плаќале членарина го надминува 500, тој наведе дека бројката била и поголема и дека од ОК ВМРО-ДПМНЕ – Кичево, потоа парите ги уплаќале во банка во име на партијата.
Судењето за овој предмет го води судијата Осман Шабани, а застапник на обвинението е обвинителката Лиле Стефанова.
Меѓу главните обвинети за овој случај се поранешната министерка за внатрешни работи Гордана Јанкулоска, поранешниот министер за транспорт и врски Миле Јанакиески, екс-пратеникот Илија Димовски и други поранешни функционери на ВМРО-ДПМНЕ.
Според обвинението поднесено од поранешното Специјално јавно обвинителство (СЈО), обвинетите се осомничени за кривичните дела повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
ПОВРЗАНИ ВЕСТИ
Сведок во „Титаник”: Над 500 лица во Кичево донирале средства за ВМРО-ДПМНЕ
МИА