Дваесетина пациенти на Инфективната клиника ги примиле скапите ампули со кои поранешниот претседател на САД, Доналд Трамп се лекуваше од Ковид-19, објави Слободен печат.
Станува збор за терапија за лекување Ковид-19 со моноклонални антитела.
Македонското Министерството за здравство ги набави овие ампули на средината на летото, а ампулите се скапи, околу 2 илјади евра во доза.
– Моноклоналните антитела се антитела кои се даваат кај пациенти со ковид кои не развиле клинички слики, не се кислородно зависни, а притоа имаат сериозни коморбидитети за фатален исход од болеста.
Досега на Инфективната клиника ја аплициравме кај млади пациенти со акутни хематолошки заболувања, со трансплантации како хематолошки и други, однносно кај пациенти со малигна болест на почеток, а не во терминален стадиум.
Кога им се аплицираше оваа терапија симптомите останаа многу слаби и не развија тешка болест. Досега сме ја дале оваа терапија кај дваесетина луѓе, вели за СП, директорката на Инфективната клиника доктор Милена Стевановиќ.