Во време на „истенчени“ нерви, психолошки притисок, но и тешка економска криза што ја предизвикаа коронавирусот и војната во Украина, „еМагазин“ денеска го прославува својот деветти роденден.
Изминативе девет години се случија неверојатни промени на политички и економски план во Македонија и светот, но се чини дека никој не претпоставуваше дека ќе доживееме заразите од научно фантастичните филмови да станат реалност, односно дека ќе мораме да се шетаме со маски за да се заштитиме од коронавирусот или дека ќе има нова војна во Европа.
Во овој период, покажавме дека во Македонија може да опстои независен медиум, без државна или странска помош, кој е пазарно ориентиран и кој секојдневно ги информира граѓаните исклучиво со вистинити и проверени информации.
Нашата решителност за борба против лажните вести и влијанија од различни центри секојдневно ја препознаваат се поголем број читатели и клиенти, што ни претставува особено задоволство и поттик за работа.
На деветиот роденден со гордост можеме да кажеме дека „еМагазин“ од основањето до денес значително придонесува кон презентирање на информации базирани на факти водејќи се од начелата за етичко и непристрасно информирање.
На тој начин успеавме нашето бебе да го израснеме до деветгодишно дете, при тоа минувајќи низ пекол и различни премрежија, но и многу убави моменти, како што е на пример чувството кога со корисна и проверена информација му се помага на еден или на илјадници наши сограѓани.
Во иднина, „еМагазин“ има сериозни планови да се зближи со јавноста уште повеќе и да прерасне во медиум кој ќе ја освои довербата на граѓаните нудејќи вистинита и богата содржина.
Единствен начин за тоа е да ја продолжиме борбата против лажни вести и сензационално информирање, но и да се бориме меѓу секојдневните политички перверзии во медиумите на прво место да се вратат вистинските проблеми на граѓаните и на компаниите.