Буџетот на Општина Струмица за 2023 година изнесува 1.642.012.000 денари, односно 27 милиони евра и е за 10 отсто поголем од ланскиот. Основниот буџет е 805 милиони денари, 731.326.000 се блок дотации, додека над 54 милиони денари се однесуваат на самофинансирачки активности на буџетските корисници, а над 51 милиони денари се однесуваат на донации.
Буџетот беше усвоен на вчерашната седница на Советот, а во обраќањето пред советниците градоначалникот Костадин Костадинов истакна дека буџетот е донесен по квалитетна дебата во текот на целата година, која ја оцени како продуктивна и успешна за сите.
– Главен проект за идната година е Јавниот електричен превоз за кој одвоивме 12 милиони денари со кој Струмица ќе ја направиме единствена во државата со имплементиран ваков проект. Ова е историски момент. Ваквата додадена вредност на Струмица ќе ги охрабрува и идните градоначалници и советници да носат одлуки и реализираат големи проекти.
Гордост за мене, за Советот и општинската администрација е фактот што денеска на 29 декември, обврските на Општина Струмица кон добавувачите се нула денари и тоа при сериозна реализација на капитални и оперативни расходи, што е реткост во државата.
Ова е потврда дека одлуките на Советот биле продуктивни, но и потврда дека и во време на многу сериозна економска и енергетска криза, успеавме да менаџираме со парите на граѓаните и тоа на начин каков што тие заслужуваат, рече градоначалникот Костадинов.
На седници на Советот беа усвоени и Програмата за работа на Советот на општина Струмица за 2023 година и сите општински програми и повеќе извештаи, програми и одлуки во рамките на работењето на општинските јавни претпријатија и институции.
ПОВРЗАНИ ВЕСТИ
На што ќе се трошат парите на граѓаните: Општина Тетово за 2023 со буџет од 29 милиони евра
Најмногу пари за плати и донации: Буџетот на Општина Гостивар за 2023 година – 1,2 милијарди денари
МИА