(ВИДЕО) Навивачите на „Шкендија“ демолираа низ Тетово, ширеа говор на омраза и повикуваа на насилство

Од Министерството за внатрешни работи (МВР) денеска информираа дека нема повредени во инцидентот кој вчера во Тетово го предизвикаа навивачите на фудбалскиот клуб „Шекендија„, „Балисти“.

Според МВР не е предизвикана ниту поголема материјална штета од навивачите, кои го нарушија јавниот ред и мир фрлајќи со камења и шишиња кон терасата на кафуле во Тетово, полно со гости.

Министерот за внатрешни работи, Оливер Спасовски денеска порача дека МВР ги презема сите потребни мерки во врска со инцидент.

„За навивачите кои скандираа националистички пораки во Тетово, во рамки на СВР-Тетово се преземаат мерки и во делот на едната или другата група. Денеска дадовме посебна задача во делот на превенцијата за да работиме со двете навивачки групи. Не смееме да дозволиме нивните конфликти, кои изобилуваат со таков говор на омраза да бидат секојдневие во Република Македонија“, рече Спасовски.

На социјалните мрежи од вчера се споделуваат видеа на кои се слушаат песни и извици од „Балистите“, со говор на омраза и повикување на насилство, по што следело и фрлање со камења и шишиња врз кафулето.

Хелсиншкиот комитет за човекови права на Република Македонија денеска преку соопштение најостро го осуди инцидент во Тетово.

„На објавените видеа од случувањата на тетовските улици на 4 ноември 2018 година, се слушаат песни и извици, каде е забележан говор на омраза и повикување на насилство, по што следело и извршување на дело од омраза, односно фрлање со камења и шишиња врз кафуле полно со гости„, наведуваат од Хелсиншкиот комитет.

Воедно, посочуваат дека со посебно внимание ќе го следат разрешувањето на овој инцидент и ќе бараат најстроги казни зa дела од омраза и говор на омраза, чија цел е, наведуваат, предизвикување меѓуетнички тензии и насилство.

Претходниот ден пак, низ улиците на Тетово навредливи зборови за албанските граѓани користеле и припадниците на навивачката група „Војводи, кои славеле 30 години.

Видео: Следиме