Акцијата на „Алкалоид“ вреди злато и треба да се чува, затоа што генерира и ќе продолжи да создава профити, се вели во анализата на реноминатата чешка инвестициска банка „Вуд енд компани“.
„„Алкалоид“ е акција која треба да се купува до ценовни нивоа до 13.600 денари за акција и потоа да се поседува односно да се чува. „Алкалоид“ сега и во иднина има и ќе има релативно силни и растечки приходи од кои ќе произлегува висока добивка и тоа го проектираат во континуитет за наредните три до четири години,“ се вели во анализата на ЦФА сертифицираните специјалисти на „Вуд енд Компани“.
Аналитичарите, овие проекции ги темелат на тековни и идни вложувања на „Алкалоид“ во нови производствени капацитети од фармацевтската индустрија, од обнова на постоечките лиценци за производство на лекови и добивање на нови лиценци.
„Со сите тие активности „Алкалоид“ создава реална и лесно предвидлива и одржлива основа за раст на приходите, зголемување на добивките и уште позасилена пазарна пенетрација на домашниот, регионалниот и глобално на светкиот пазар. На регионалниот пазар е препознаен и важи за исклучително квалитетен бренд,“ се додава во анализата.
Како можни ризици кои постојат аналитичарите ги наведуваат општите ризици кои важат за сите фармацевтски производители: можни легислативни регулаторни ограничувања од национални авторитети во областа на издавање дозволи и пуштање во промет медикаменти како и можни ценовно-курсни варијации на некои валути од мноштвото земји во кои извезува најголемиот македонски производител на лекови.